ریاض۔۔۔۔نایف یونیورسٹی برائے سلامتی امور نے تازہ ترین جائزے کے نتائج شائع کرکے بتایا کہ 87.8فیصد جرائم کا ارتکاب کرنے والے 30برس سے کم عمر کے پائے گئے۔ زیادہ تر وارداتیں غصے کے نتیجے میں ہوئیں۔قتل کے 45.3فیصد واقعات کا محرک غصہ بنا۔جرائم کے ارتکاب میں مذہبی آگہی کا فقدان بہت بڑا سبب مانا گیا ہے۔ کم تعلیم یافتہ لڑکوں میں جرائم کے ارتکاب کی شرح زیادہ ہے۔

ریاض۔۔۔۔حالیہ ایام کے دوران انڈسٹریل سٹیز میں کام کرنیوالی سعودی خواتین کی تعداد میں اضافہ ہوگیا۔ زیادہ تر دواسازی اور کھانے پینے کی اشیاء تیار کرنیوالی فیکٹریوں میں کام کررہی ہیں۔2014سے لیکر 2017ء تک فیکٹریوں میں کام کرنے والی سعودی خواتین کی تعداد 5480سے بڑھ کر 7501ہوگئی۔سعودی انڈسٹریل سٹیز اتھارٹی نے اعدادو شمار جاری کرکے بتایا کہ سب سے زیادہ سعودی خواتین جدہ کی فیکٹریوں میں کام کررہی ہیں جہاں ان کی تعداد3234تک پہنچی ہوئی ہے۔

مکہ مکرمہ ..... مسجد الحرام کے امام و خطیب شیخ ڈاکٹر اسامہ خیاط نے واضح کیا ہے کہ دل میں پیدا ہونے والے شکوک و شبہات کا مداوا اللہ تبارک و تعالیٰ نے قرآنی آیات اوراحادیث مبارکہ کی پابندی میں ودیعت کررکھا ہے۔ وہ ایمان افروز روحانی ماحول میں جمعہ کا خطبہ دے رہے تھے۔ امام حرم نے توجہ دلائی کہ انسان کے بگاڑ کی اصلاح اور روحانی ترقی دل کی درستگی سے جڑی ہوئی ہے۔ رسول کریم صلی اللہ علیہ وسلم نے ایک مرتبہ یہ کہہ کر دل کی اہمیت جتائی تھی کہ ”خبردار کہ انسان کے جسم میں ایک ٹکڑا ہے اگر وہ درست ہوجائے تو پورا جسم ٹھیک ہوجائے اور اگر وہ خراب ہوجائے تو پورا جسم خراب ہوجاتا ہے۔ وہ دل کے سوا کوئی اورنہیں۔ امام حرم نے بتایا کہ اس ارشاد رسالت سے یہ بات واضح ہوجاتی ہے کہ دل کی درستگی ہر نعمت سے بڑھ کر ہے او ردل کی خرابی ہر بدی کی جڑ ہے۔ اگر دل ٹھیک ہوگا اس میں اللہ کی محبت کے سوا کسی او ر کی محبت کا غلبہ نہیں ہوگا ۔ ایسی صورت میںانسان از خود ممنوعہ امور سے اجتناب برتے گا۔ شکوک و شبہات کی جانب جانے سے گریز کریگا۔ حرام امور سے دور ہوگا لیکن اگر دل میں خرابی پیدا ہوجائے تو وہ نفسانی خواہشات کے آگے جھکے گا۔ اللہ کی مرضی کے مطابق زندگی گزارنے سے اعراض برتے گا۔ انسانی جسم کے تمام اعضا ءخراب ہوجائیں گے اور انسان کو راہ حق سے منحرف کردیں گے۔ امام حرم نے کہاکہ تمام لوگ اللہ تعالیٰ کیساتھ اخلاص، اس پر توکل ، اسکی طرف میلان ، اس سے محبت ، اس سے مدد ، اس سے امید و بیم اور اسی کی ماتحتی کو اپنی پہچان بنائیں۔ صبر کا مظاہرہ کریں۔ غیبی امورکی پوری قوت کیساتھ تصدیق کریں۔ حرم امور مثال کے طور پر کفر، شرک ، شک ، نفاق، ماسیت، ریاکاری، غرور، فخر و مباحات، مایوسی، اللہ کی پکڑ سے بے نیازی، مسلمانوں
کی تکلیف سے خوشی، مسلمانوں کے مصائب پر انکا مذاق اڑانے جیسے گندے امور سے پرہیز کریں۔ اس بات کا دھیان رکھیں کہ مسلم معاشرے میں برائی کا غلبہ نہ ہو۔ امام حرم نے کہا کہ یہ ساری برائیاں نادانی سے پیدا ہوتی ہیں ان ساری برائیوں کی جڑ دل کا اللہ تعالیٰ کی ماتحتی میں جانے سے انکار ہے۔ امام حرم نے بتایا کہ دل کے امراض کے علاج کیلئے اللہ تعالیٰ نے شرعی سزائیں مقرر کی ہیں۔ یہ سزائیں بندوں پر اللہ کی رحمت ہیں۔امام حرم نے کہا کہ اللہ کا دین یہ ہے کہ تمام لوگ اللہ اور اسکے رسول کی اطاعت کریں۔ اللہ اور اسکے رسول سے محبت کریں۔ رحمدلی اور نرم دلی کا مظاہرہ کریں۔ شیطان کے چکر میں نہ پڑیں۔ دوسری جانب مدینہ منورہ میں مسجد نبوی شریف کے امام و خطیب شیخ ڈاکٹر عبدالمحسن القاسم نے جمعہ کا خطبہ حقوق کے موضوع پر دیا۔ انہوں نے کہا کہ اگر بندگان خدا ایک دوسرے کے حقوق کی ادائیگی کا اہتمام کریں گے تو اس سے پورا معاشرہ ٹھیک ہوگا۔ سب لوگ انصاف کی پابندی کریں۔ ہر انسان کو اپنے رب ، اپنے رسول، اپنی ذات ، اپنے اہل خانہ ا ور اپنے معاشرے کے لوگوں کے ساتھ انصاف سے کام لینا چاہئے۔ انسان کا سب سے بڑا حق اپنے آپ پر یہ کہ وہ اپنے نفس کا تزکیہ کرے۔ انسان کا نفس برائیوں کو پسند کرتا ہے برائیوں کا حکم دیتا ہے۔ اللہ تعالی سے ہمیشہ اپنے نفس اور اسکی برائیوں سے پناہ مانگتے رہنا چاہئے۔ اللہ تعالیٰ نے پیغمبروں کو تزکیہ نفس کے لئے مبعوث کیا تھا۔ یہ ہر نبی کی بعثت کا اہم مقصد تھا۔ قرآنی آیا ت بتاتی ہیں کہ ابراہیم اور اسماعیل علیہما السلام کوتزکیہ نفس کا مشن سونپا گیا تھا۔
نفس کا تزکیہ اہل ایمان کی خصوصیات میں شامل ہے۔ امام مسجد نبوی نے واضح کیا کہ نفس کا تزکیہ احکام الہیٰ کی تعمیل او رممنوع امورسے اجتناب کرکے کیا جاسکتا ہے۔اللہ تعالیٰ نے زکوة ، خیرات و صدقات کو نفس کے تزکیے کا اہم ذریعہ قرار دیا ہے۔ دعا بھی عظیم عبادت ہے۔ اسکی بدولت بھی انسانوں کے دل درست ہوتے ہیں اور نفس کا تزکیہ حاصل ہوتا ہے۔

ریاض۔۔۔۔8لاکھ6ہزار742سعودی کارکنان کی تنخواہیں 3ہزار سے زیادہ نہیں۔ نجی اداروں میں سعودی کارکنان کی مجموعی تعداد 1762ملین ہے۔ ان میں سے 46فیصد ایسے ہیں جن کی ماہانہ تنخواہ3ہزار سے بھی کم ہے۔سماجی کفالت کے ادارے نے 2018کی پہلی سہ ماہی کی بابت اعداد شمارمیں بتایا کہ 21644ہزار سعودی شہری 1500ریال تنخواہ لے رہے ہیں۔ دوسری جانب 2لاکھ27ہزار856سعودی 10ہزار ریال تنخواہ حاصل کررہے ہیں۔3لاکھ36ہزار388سعودیوں کی تنخواہیں 5ہزار سے لیکر9999کے درمیان ہیں جبکہ 3لاکھ91ہزار9سعودی 3001سے 4999ریال تنخواہ پارہے ہیں۔

عدن..... یمن میں آئینی حکومت کی بحالی کیلئے قائم عرب اتحاد نے اعلان کیا ہے کہ 4جہازوں کو الحدیدہ بندرگاہ جانے کا گرین سگنل دیدیا گیا۔ فی الوقت 6جہاز الحدیدہ بندرگاہ پر سامان اتار رہے ہیں۔ 7دیگر جہاز سامان اتروانے کے منتظر ہیں۔ گزشتہ 68 دن سے الحدیدہ بندرگاہ معطل پڑی ہوئی تھی۔ حوثی باغیوں نے 39 دن سے زیادہ تک الحدیدہ بندرگاہ کو معطل کرنے اور رکھنے کا سلسلہ جاری رکھا۔ دریںاثناءیمن کی سرکاری افواج اور حوثیو ںکے خلاف برسرپیکار رضاکار الحدیدہ محاذ کے زبید اور التحیتا ضلعوں کو باغیوں سے صاف کرنے میں لگے ہوئے ہیں۔ یمنی افواج مذکورہ دونوں ضلعوں سے 30کلو میٹر کے فاصلے پر پہنچی ہوئی ہیں اور الخوکھا سے لیکر الحدیدہ کے جنوب مغربی مضافات تک ساحل کو محفوظ بنانے کا آپریشن کررہی ہیں۔ سرکاری فوج کے شانہ بشانہ لڑنے والے رضاکاروں نے ایران کے حمایت یافتہ 60حوثیوں کو قیدی بنالیا۔ دیگر فرار ہونے میں کامیاب ہوگئے۔دریں اثناءیمن میں حوثی باغیوں نے اتحادی طیاروں کی بمباری سے اپنے ایک رہنما کی ہلاکت کا اعتراف کرلیا جبکہ البیضائ، مغربی ساحل، تعز اور شمالی لہج کے محاذ پر اتحادی طیاروں کے فضائی حملوں میں70کے قریب حوثی ہلاک ہوگئے۔

ریاض ..... سعودی عرب میں سکونت پذیر روسی خاتون نے مملکت سے پسندیدگی کا اظہار کرتے ہوئے کہا کہ سعودی عرب شاندار ملک ہے۔ یہاں امن و امان کا بسیرا ہے۔ یہ ملک جرائم کے طوفان سے پاک ہے۔ یہاں خواتین خود کو بہت زیادہ محفوظ سمجھتی ہیں۔ یہ تہذیب و ثقافت سے مالا مال ریاست ہے۔ یہاں سب سے انوکھی بات میرے مشاہدے میں یہ آئی کہ میں گاڑی سے سفر کررہی تھی تو اونٹوں کے ریوڑ دیکھنے کو ملے۔ یہ منظر مجھے بہت اچھا لگا۔ یہاں جنادریہ اوراونٹوں کا میلہ بھی دیکھنے سے تعلق رکھتا ہے۔ روسی خاتون نے اپنے ان تاثرات کا اظہار وڈیو کلپ میں کرکے اسے سوشل میڈیا پر جاری کردیا۔ یہ وڈیو ان دنوں سوشل میڈیا پر وائرل ہے۔

ریاض ..... سعودی عرب کے نجی ادارے 2لاکھ49ہزار غیر ملکیوں کو 10ہزار ریال سے زیادہ ماہانہ تنخواہ دے رہے ہیں۔ 2برسو ں کے دوران 8لاکھ 10ہزار غیر ملکی سعودی مارکیٹ سے نکل گئے۔1500ریال تنخواہ پانے والے تارکین کی تعداد 5568001 ہے۔ 1501سے لیکر 2999ریال تک تنخواہ پانے والے غیر ملکی 1061.143ہیں جبکہ 3ہزار ریال تنخواہ پانے والے تارکین 108.603ہیں۔ 301سے 4999ریال تنخواہ پانے والے تارکین وطن 388.229ہیں۔ جبکہ 5ہزار سے 9999 ریال ماہانہ تنخواہ حاصل کرنے والے 333.082ہیں۔10ہزار ریال اور اس سے زیادہ تنخواہ پانے والوں کی تعداد 248.951ہے۔ یہ غیر ملکی ملازمین کا 3.2فیصد بنتے ہیں۔نجی اداروں میں کام کرنے والے 72فیصد غیر ملکیوں کی تنخواہ 1500ریال ماہانہ سے کم ہے۔ فی الوقت 7.71ملین غیر ملکی سعودی مارکیٹ میں برسرروزگار ہیں۔

ینبع ..... باخبر ذرائع نے واضح کیا ہے کہ بورڈ سے ٹکرانے والے ٹرک حادثے کی سوشل میڈیا پر گردش کرنے والی وڈیو کلپ رمضان المبارک کی ہے۔ یہ نیا واقعہ نہیں پرانا ہے۔ تفصیلات کے مطابق ایک پاکستانی شہری ٹرک چلا رہا تھا۔ اچانک ہائیڈرولک سسٹم میں خرابی پیدا ہوجانے پر ٹرک کا عقبی حصہ اوپر کی جانب اٹھ گیا اور بورڈ سے ٹکرا کر ٹرک سے الگ ہوگیا۔ پاکستانی ڈرائیور معجزاتی طور پر زندہ بچ گیا۔ یہ واقعہ الطائرہ چوک سے قبل ینبع ایئرپورٹ روڈ پر پیش آیا تھا۔